Прывітанне!
Гэта Максім і Кірыл з падкаста «Зроблена ў Польшчы», і мы хочам распавесці, як правялі не толькі лета, але і цэлы год праекта.
Але пачнем з падзякаў. Мы неверагодна ўдзячныя вам, дарагі чалавек, які ці якая чытае гэты ліст. Бо менавіта дзякуючы вам гэты падкаст працуе. Вашыя рэсурсы дапамагаюць нам рэгулярна выпускаць новыя эпізоды. Больш за тое, гэта ўжо не толькі выпускі па серадах, а і дадатковыя відэа, новыя рубрыкі і кароткія фарматы. Нават рэпартажы калі-нікалі прыносім! Шчыры дзякуй — лічым, што вы можаце ганарыцца тым, што ствараеце «Зроблена ў Польшчы» разам з намі!
Цяпер да лічбаў. Вось якім быў першы год падкаста «Зроблена ў Польшчы»:
• амаль 3,500 падпісак у ютубе, яшчэ 3,000 — тыкток і інстаграм;
• больш за 215 чалавек падтрымалі падкаст грашыма;
• 35 чалавек робяць гэта па штомесячнай падпісцы;
• за год падкаст на ютубе пагладзелі больш за 250 тысяч разоў, а разам з кароткімі фарматамі ў шорт, тыктоку і інстаграме за набралося больш за 2 млн праглядаў;
• 1,000 чалавек глядзелі трансляцыю «Зроблена» падчас другога тура выбараў прэзідэнта Польшчы;
• агулам на працу падкаста за першы год мы з вамі выдаткавалі каля 12 тысяч даляраў: усе грошы пайшлі на кампенсацыю працы тэхнічнай каманды;
• а каб было, што выдаткаваць, спачатку трэба было прыцягнуць — і тут яшчэ раз аграменнае вам дзякуй за тое, што падтрымліваеце працу падкаста;
• станам на зараз прыходы ад рэкламы прыкладна раўныя прыходам ад данатаў (рэгулярных і разавых);
• пакуль мы не ведаем, колькі змаглі сабраць праз падаткавы праект: партнёры абяцаюць, што даведаемся ў лістападзе. Як толькі — адразу распавядзем!
Калі крыху адысці ад лічбаў, то гэта быў вельмі насычаны год. Мы і вучыліся працаваць у кадры разам, і запісваліся з гасцямі, і працавалі ў прамым эфіры, і тэставалі кароткія фарматы. Былі аж 4 афлайн сустрэчы: 2 на польскай мове і 2 на беларускай. За гэты час мы пасупрацоўнічалі з 7 рэкламадаўцамі і сапраўдным Музеем! Размова, канешне, пра Музей гісторыі польскіх яўрэяў POLIN. Асабліва прыемна, што школа польскай мовы Polski Na Tak і аўташкола Denis Drive сталі нашымі сталымі партнёрамі.
За гэты год мы ўзялі каментар у маршала Сэйма Польшчы Шымана Галоўні і дэпутаткі Ганны-Марыі Жукоўскай, пару разоў апрасілі палякаў пра стаўленне да мігрантак і мігрантаў з Беларусі, запусцілі новую рубрыку пра працу і жыццё ў Польшчы з Таняй Дзямчук. І, плануем і верым, што далей будзе толькі больш!
Напрыканцы — дзякуй цудоўным людзям, якія ўвесь гэты год дапамагаюць ствараць «Зроблена ў Польшчы»: Насце за бодры мантаж і гук, Уладзю і Мікіце за здымкі, Антону за нашыя вокладкі, Арцёму за дызайн падкаста, Сашы і Ігару за трансляцыі падчас выбараў!
І яшчэ раз — дзякуй кожнай і кожнаму з вас, хто стварае падкаст разам з намі, адной вялікай камандай: сваёй зацікаўленасцю, актыўнасцю, сваімі рэсурсамі. Шчыры дзякуй і заставайцеся з намі!
З павагай,
Максім і Кірыл