THE DAILY VERDICT — Tuesday Poetry
Dinsdag 20 Oktober 2026
Dag 293 van 365 · Week 43
Predikante langs die Pad
vir my oom
My oom het van die pad vertel,
die een Calvinia toe:
“Die borde, seun, is predikante.
Hul wys jou waar en hoe.”
Net ná die rivier het die teer
in ’n grondpad oorgegaan.
’n Pyl het vir die draai gewaarsku.
Hy het net aangegaan.
Maar om die draai: ’n windpomp,
’n boer wat by sy hek
met stories wat my oom wou hoor
die middag uit kon rek.
Nou ry ek ver van Calvinia,
op paaie breed en reg.
Die borde praat ’n ander taal
en wys my steeds die weg.
En as ek by die laaste bord
eendag tot stilstand kom,
hoop ek die boer staan by sy hek
en my oom wag langs hom.
— Riaan M. Odendaal
