Мяне завуць Аляксандр Карнейчук, і я запрашаю вас у мой творчы сусвет.

Тут я пішу дзіцячыя казкі і аповеды, ствараю з іх аўдыягісторыі. Тут выпускаю падкасты і запісваю дыджэйскія міксы. Тут я пішу кнігу і дзялюся яе гісторыямі.

Доўгі час я працаваў журналістам у моладзевым часопісе 34mag.net. Мы выпраўляліся аўтаспынам у Гародню на андэграўндны панк-канцэрт і ўсю ноч віселі з патронам лакальнай сцэны; начавалі ў аўтамайстэрні пінскага кулібіна напярэдадні аўтадэрбі — жорсткай бойкі на машынах на мясцовым стадыёне; збіралі байкі разам з foursquare-мэрам "Цэнтральнага" — легендарнага багемнага шынка ў Менску. Цудоўны быў час!

Пазней я перабраўся ў рэдактарскі фатэль часопіса і сачыў за прыгодамі калег ужо з утульнай рэдакцыі ў самым сэрцы Кастрычніцкай, адначасова ўдзельнічаючы ў стварэнні ўтапічнага раёна будучыні праз арганізацыю фестывалю Vulica Brasil.

Затым мяне пацягнула ва ўласны праект, і мы з сябрам адкрылі інтэрнэт-радыё Radio Plato. На яго хвалях узнікла моцнае і дружнае кам'юніці дыджэяў, прамоўтараў і радыёвядоўцаў. Паралельна я быў аўтарам і су-аўтарам некалькі падкастаў (Editorial Podcast, Muzak on Fridays), выступаў на фестывалях, ладзіў вечарыны, вучыў іншых таму, што ўмею сам.

Палітычная сітуацыя ў Беларусі вымусіла мяне эміграваць, і мы працягнулі радыйную справу анлайн. Найвялікшым маім дасягненнем за гэты час стаў шасцісерыйны падкаст "Ікарус" пра гісторыю беларускай электроннай музыкі ў 90-х — ім я падзялюся на гэтых старонках. На жаль, у лістападзе 2025 года беларускі рэжым прызнаў Radio Plato экстрэмісцкай арганізацыяй. Гэта фактычна паралізавала дзейнасць радыё: частка каманды знаходзілася ў Беларусі, і працяг працы ствараў бы рызыкі для яе бяспекі.

Паралельна я пачаў пісаць мастацкія творы. Я задумаў вялікую кнігу (а можа, і тры) — гістарычны раман пра пачатак XVII стагоддзя, калі свет упершыню стаў глабальным і глыбока ўзаемазвязаным. Апроч гэтага, з'явіліся невялікія апавяданні, прыпавесці, замалёўкі, якія часта прыходзілі да мяне ў снах. А калі я быў у разлуцы з дачкой, пачалі нараджацца казкі — з іх дапамогай я адчуваў сувязь з ёй. Дзякуючы досведу ў саўнддызайне я стаў агучваць свае творы і выкладаць іх у выглядзе аўдыягісторый.

На гэтай старонцы я буду публікаваць новыя апавяданні, фрагменты рамана, аўдыягісторыі, падкасты і міксы. Частка матэрыялаў будзе ў агульным доступе, частка — толькі для падпісчыкаў.

Калі вам блізкае тое, што я раблю, буду вельмі ўдзячны за падтрымку. Дзякуючы ёй я змагу ствараць яшчэ больш гісторый і дзяліцца імі з вамі, не адкладваючы творчасць “на пасля”. Я веру, што так я змагу захаваць сваю незалежнасць як творца і працягваць будаваць свой творчы сусвет далей.

Дзякуй!