維路！記憶唔多可靠、而且有時連邊啲係夢邊啲係真實都可能分唔清，記得經歷過嘅一日，唔知點解又會經歷多次但內容又有少少唔同
呢個時候你就知，可能只係夠鐘食藥
今次事件係2016年 2ch一位網友開咗個叫「雖然咁嘅時間但我想講下我嘅一件不可思議體驗」嘅PO
※以下粗體字係原PO樓主嘅發言 斜體係本人註解
原PO時間係凌晨3點
既然醒咗就排一排解
喺好耐之前有一件好古怪嘅事，而且件事又唔多老黎所以我都冇同身邊嘅人講過
單刀直入咁講
係一件應該死咗嘅人但仍然在生嘅事嚟
OK 咁你講啦
原來係咁
真係幾不可思議
不可思議
一半不可思議
去到呢度幾不可思議
文呢？
冇寫定先？
不可思議ed
不可思議PO
快寫
大概係15年前一個星期五嘅夜晚
嗰陣我阿嫲一齊住件事係關於阿嫲有客人嚟探佢
個客人係阿嫲嘅一個遠房親戚嘅女人，喺打仗嗰陣佢剛結婚冇耐嘅老公過咗身
之後佢都冇再婚亦冇細路，一路都係獨身一個
到最近為止佢都住喺同我屋企好遠嘅地方，不過佢見自己身子愈來愈唔好，諗住喺同老公有回憶嘅地邊過自己嘅晚年
就係咁，既然順路所以打算嚟我屋企打個招呼咁
原來係咁，明晒
好不可思議㗎呢
扯... 原來係雞仔餅PO... 我瞓...
唔知演繹得啱唔啱 原文貌似係講只係普通有親戚嚟吹水飲茶食件餅咁
Sorly 剛剛醒打字慢咗啲
阿嫲笑住咁話「渠（以下我稱姑婆）雖然一把年紀但仍然好精靈，一定好長壽」
雖然同翻譯冇關 但疑似有用到九州嗰邊嘅話 估計佢地係九州人嚟
對我嚟講就只係有客人探我阿嫲所以冇咩特別擺上心
「尼到時都同人打個招呼啦」感覺只係俾阿嫲迫見啲長輩咁
推
之後到星期六，中午時分左右，我俾老母叫醒咗
星期五晚阿嫲講完之後我冇理，自己通宵嚟所以瞓到咁晏
老母話客人嚟咗叫我落樓打招呼，即係話姑婆嚟到
我喺樓上簡單梳洗一下換件衫後就落樓
好不可思議
我打開和室道紙門嗰陣，尋日明明好實嘅紙門變到好輕
原來係阿嫲見要招呼客人所以打掃過又潤滑過嚟
但我唔知呢件事，我都係用返平時咁嘅力去開道門，所以好明顯太大力
道門砰一聲趟開咗
喺裡面嘅阿嫲同姑婆好似嚇親咁望住我，個氣氛鬼死咁老尷我只好苦笑咁打招呼
「你好嗎？要你咁遠水路嚟」
我睇緊㗎
姑婆的確睇唔出咁老睇落好精神
佢喺坐墊上面正襟屈膝正座
不過佢就用一個非常驚訝嘅表情望住我
我心諗頭先的確係有啲失禮嚇親人，但咁樣望法又會唔會跨咗啲呀
佢雙眼睜到大大 口都半開咁望住我，好似見到啲難以置信嘅嘢咁
咁嘅氣氛下搞到我都唔識郁，我打完個招呼後我諗都呆呆咁企咗10秒
然後，姑婆突然間瞓低咗
下？！
姑婆咩事？！
我唔知係唔係只係佢坐得耐腳痺，但佢係全力冇晒力好似冧低咁瞓低
阿嫲同我身後嘅老母見到即刻埋去睇姑婆
「唔係因為我呀嘛？」我咁諗住都埋去睇姑婆咩事
但係姑婆冇理到阿嫲同老母，佢冧低咗之後都係一直咁望住我，重喊咗出嚟添
我埋到去姑婆身邊，姑婆即刻用雙手捉住我隻手
一路哽咽一路摸住我隻手，好似係想摸真下我係咪真係存在咁款
跟住佢喊得愈來愈大聲已經聽唔清佢講咗啲咩
但係好似係叫緊一個人嘅名咁
你好似某人？
喔哦！
喺姑婆瞓低（定跌低？）之後一陣
我父母同阿嫲覺得姑婆可能身體唔舒服所以決定同佢去醫院
我唔係好知詳情，但貌似姑婆心臟唔好
係咪佢長途跋涉嚟到又嚇咗一嚇所以造成咗啲負擔
我成個局外人咁，睇住姑婆由救護車送去醫院
記得嗰陣救護車好似冇響笛
搞到要入院...
喺姑婆上咗車之後一陣
我都諗係唔係因為我搞到姑婆咁所以個人都呆晒
不過屋企人就同我講話唔係我嘅錯，阿嫲重同我道歉話佢應該同我講道紙門潤滑咗
之後佢哋全部都去晒醫院，留低我一個喺屋企看門口
你屋企人真係好
俾着我老父老母一定癲咗咁起勢屌柒我...
到黃昏時分，淨係老豆返咗嚟
老豆話姑婆冇大礙，不過就話好想見下我
雖然我唔知點解姑婆話想見我但去探下病都應該，所以我都去咗醫院
嗰陣黃昏左右
唔...
到我去到醫院嗰陣大概係太陽都開始落山嘅時候
我重諗緊，乜當日入院當日就有見探㗎喇咩？
我去到病房
唔記得係唔係單人房喇，總之見姑婆一個人瞓咗喺床
姑婆見到我「樓豬？」咁叫我個名，我都係第一次聽到姑婆正常講嘢把聲
睇緊睇緊
知你咩名？
我話係呀咁
姑婆就「呀係嘅... 你係樓豬... 真係唔好意思...」
姑婆諗住坐喺身，我幫手將張床升起
而家諗返起房入面淨係得我同姑婆
然後姑婆就開始講
。我同佢過咗身嘅老公個樣生到好似餅印咁
。佢第一次見佢老公嗰陣，佢老公又係唔小心大力開紙門
。我尷尷尬尬咁講嘅嗰句招呼，同當時佢老公講嘅都係一樣
。見到已經唔喺度所愛嘅人再次出現喺佢面前令佢嚇咗一大驚
唔知幾時開始姑婆一路喊住咁講呢段事畀我聽
咦喂？做咩突然真係咁不可思議！
姑婆一路講一路係咁同我道歉
話講埋啲古怪嘢唔好意思，嚇親你唔好意思咁
我同返姑婆講唔古怪呀我都只能夠咁講，姑婆望住我雙眼佢都笑返
唔知幾時我父母都嚟到，話穩陣起見叫姑婆不如留院觀察一晚
喔！
屋企人話叫我不如聽日都嚟醫院睇姑婆，我都同意
既然姑婆話我生得似佢老公，我諗姑婆見到我應該都會精神返啲嘅
喺離開病房之前姑婆叫住我，我行返埋去，姑婆伸出佢嘅雙手控住我塊面，然後露出溫柔慈祥嘅微笑
睇嚟姑婆又諗起佢老公
返到屋企後，今日突然有咁多事發生，好似天色都黑得快啲咁
食過晚飯又睇下電視咁，但呢部份嘅記憶有啲曖昧
總之聽日再去醫院睇姑婆啦，推晒聽日原本嘅行程
沖個涼，好快就去瞓
然後更不可思議嘅嘢發生
喔呵？！
推！
我喺一個森林入面行緊
我唔知呢度係咩地方，亦唔知點解我會喺度行同行去邊
但係我前面同後面有好多人，個個都喺度行緊
喺行緊嘅途中忽然之間聽到有巨響，我即刻趴低
點解聽到巨響要趴低我都唔知，淨係覺得總之就趴低個身自動咁做
我望向後面，見到後面有個人已經倒地
我好自然咁走去嗰個人度，我喺趴住咁埋去
我不斷咁同嗰個人講嘢，又大聲叫佢，但明明我都唔知佢係邊個嚟
就好似我識得佢咁，不斷咁同佢講「唔可以死喺度！唔可以死喺度！你重有OOO等緊你㗎！」
我好大聲咁叫但我唔記得咗自己實際講咗啲咩
而且當其時不斷有爆音巨響遮晒我把聲
發夢？
再行咗唔知幾耐，啲聲終於停晒
我一路撐住嗰個人行，然後我哋嚟到一個比較平地啲嘅地方可以定落嚟
唔係，定唔到落嚟
我望向嗰個人，表面睇唔到佢有咩外傷，但佢就好似死咗咁冇晒反應
喺後面有個着一樣衫嘅男人爬到嚟同我講嘢
「喂XX 你冇事丫嗎？」
「我冇事，但佢點算」我咁答返
「佢重未死，冇事嘅」佢應返我
但係之後嗰個男人望住我，又望下冇反應嘅嗰個人個樣
又睇下佢個心口？定件衫之後，嗰個男人好驚訝咁大叫
「你到底係邊個？！」
推
喺呢一刻我知道我經歷緊一啲唔尋常嘅嘢
我明明住喺日本，我唔知呢個咩地方，我個名更加唔係叫XX
係咪發緊夢... 我咁諗嘅時候背脊突然間有陣好似就嚟爆咁嘅感覺
我凌空飄起咗，我望返向地面嘅嗰個男人，但到最後我都睇唔清楚佢個樣
跟住我飄咗一陣，然後跌返落地，我喺呢個時候醒返
唔...
簡單嚟講係發夢，我醒返嗰陣已經係中午，我全身出晒汗
係唔係因為我聽咗有關打仗死咗嘅人嘅事所以我發咗個咁嘅夢呢我淨係覺得好攰
然後我聽到門出面有人叫我，係老母叫我
應該係叫我起身去醫院睇姑婆，我開門同返老母講係咪行得去醫院喇咁
點知老母好奇怪咁望住我話「去醫院？睇邊個？」
我答返「去醫院睇姑婆呀嘛唔係咩？」
但老母又講「邊個姑婆？」
我同老母講「咪尋日好遠嚟探我哋嘅姑婆囉」
老母答返「姑婆今日先嚟，佢已經喺樓下喇」
我完全唔知發生咩事，求其應咗老母幾句就閂返房門
我望返個日曆鐘，的確就係嗰個星期六，時間係中午
真係真係唔知咩事，總之我換件衫落樓
老母係咁催我動作快啲，搞到我又無情力咁砰一聲開咗道紙門
喺入面嘅人有3個
阿嫲，當然有我見過嘅姑婆
同埋一個未見過嘅阿伯
咦？！
姑婆出咗院？
佢哋3個又係嚇咗一驚咁望住我
姑婆當時嘅坐姿同我記憶中嘅一樣，個阿伯就坐得比較放鬆係盤腿而坐嘅
我感覺到非常強嘅Deja vu 開口打招呼「你好嗎？要你咁遠水路嚟」
根據我之前嘅記憶姑婆就係喺呢度喊起上嚟
姑婆同阿伯對望咗一下，然後好開心咁笑咗出嚟
就嚟完？有啲眼瞓...
不過真係幾不可思議...
即係話，你發嗰個夢之前姑丈公？應該係死咗
但夢醒咗之後發覺姑丈公重在生？
阿嫲開口
「嗱係咪呢 噯都話渠好似樣㗎啦」
個阿伯就笑笑口咁講
「真係喎！同我後生嗰陣一樣咁靚仔！」
姑婆掩嘴笑住話
「真係好似後生嗰陣嘅你。老嘢呀你記唔記得？第一次見你嗰陣，你又係咁樣開紙門，跟住你又係同佢講同一樣嘅嘢。真係嚇咗一跳」
個阿伯就詐傻扮矇咁話冇呀邊有呀之類咁同姑婆有講有笑
而我個樣表面都係笑緊但內心已經亂到不得了
話唔定樓豬係植物人... 全部都係妄想嚟...
之後同姑婆夫婦傾偈知返
。姑丈公打仗嗰陣被俘虜過但後來放返冇事
。返到日本後兩夫婦一齊住，而且都有細路
。姑丈公因為工作嘅關係先搬離開鄉下，佢想晚年返鄉下養老
。就喺佢哋搬屋返鄉下途中嚟探我哋
阿嫲話前一晚佢都有講到係一對夫婦嚟作客
不可思議嘅感覺不斷咁籠罩住我，但我又冇理由開口話「乜唔係姑丈公打仗死咗得姑婆嚟探我哋而且重瞓低咗」
而姑婆兩個都好普通咁同我哋傾下坐下飲下茶
喺入黑之前就走咗
你係咪遇到反枕？
百鬼夜行嘅妖怪之一 會趁人瞓覺嗰陣搞事嘅
件事就去到呢度
而家佢哋兩老都已經去咗，件事又一直同唔到人講所以都忘記得7788
只係頭先又發咗同一個夢所以彈醒咗先開電腦寫
又長又慢唔好意思，只係過住平凡人生嘅我一件不可思議嘅經歷
幾有趣
比起係咪不可思議，本身故事都幾吸引
唔知係咪夢定係現實嗰個位都令人好在意！
而家諗返，話唔定夢入面嗰個男人講嘅XX呢個名就係姑丈公個名嚟
寫完之後感覺鬆晒
多謝推PO嘅巴打
好得意嘅故事
係唔係平行世界之類嘅嘢？
話唔定真係有好多個唔同嘅世界存在
好似穿越唔同嘅世界線咁
你會唔會係姑丈公嘅轉世嚟？
***全篇完***
你又點睇呢
本譯文原發佈於連登討論區
此版本經過部份修正
原link：http://viper.2ch.sc/test/read.cgi/news4vip/1454176866/