從我第一次接觸鐵人三項開始，心裏面已經種下咗一個夢：有一日，可以踏上 Ironman 世界錦標賽嘅舞台。呢條路走咗好多年，經歷過一次又一次訓練同比賽，流過無數汗水同淚水，終於，上星期日，我站喺呢個屬於全世界頂尖運動員嘅起點線上。
游泳尚算穩定，但真正嘅磨練，喺單車開始。
呢條路線幾乎係「源源不絕嘅上斜」。即使我喺澳洲練習過無數上落山，但當日嘅感覺係，你以為見到山頂，轉個彎卻係另一個更高嘅山。腳不停踩，但永遠未見盡頭。汗水一次又一次流乾，再重新滲出，雙手同雙腳開始結滿鹽霜，頭盔鏡片上布滿白色鹽結晶，視線被模糊。
去到跑步，已經唔再係體能比賽，而係純粹同自己意志嘅角力。
去到 17–18 公里，身體已經去到極限：頭暈、作悶、想嘔，熱浪完全散唔走。我逼住要坐低。大會工作人員即刻來到，檢查後建議我上救護車，但我當場拒絕，因為只要我一步一步行，我就仍有機會去到終點。
我飲咗啲水，不斷用水淋身降溫，身體稍為回復後再逼自己站起身。每一步都沉重，但我知道，呢條路唔係靠肌肉，而係靠靈魂托住我去走。
去到最後 20K，情況更困難：我嘗試再跑，但每次一跑，頭暈和胃痛就更嚴重。任何補給一入口就會想嘔，連飲水都會吐返出嚟，整個過程我嘔咗三次，甚至連胃液都吐盡。每次想跑，連直線都做唔到，世界好似偏斜咗。
幸好在路上遇到其他參加者，他們成為我最真實嘅力量。大家並肩行、互相扶持。我逼自己同佢哋不停講嘢，語無倫次都好，至少可以保持腦袋清醒。靠住彼此的腳步與鼓勵，我一步一步向前，沒有放棄。
夜幕慢慢降臨，終點前街道燈光亮起。觀眾一層又一層企喺兩旁，拍手、吶喊、有人伸手想同我擊掌。就在終點數十米之前，我全靠腎上腺素推動，竟然可以用盡最後氣力跑入紅地氈。觀眾的呼喊、大會司儀的聲音像電流一樣穿透我，精神為之一振。
當我踏過終點，Casper（剛剛成為世界冠軍）為我掛上獎牌的那一刻，我終於放鬆下來，慢慢行到休息區。周圍係一班眼神滿是疲倦但完成咗自己戰役的參加者，看到食物時我坐低想起身取食，但我發覺自己已經冇力再站起來，視野慢慢變黑，舉手呼救也無力。
我堅持用最後一口氣站起，扶住旁邊的枱凳一步一步向醫療帳篷移動。差不多要跌倒的時候，有位之前和我一同行的澳洲選手見狀，立即過來攙扶，把我送進醫療帳篷。之後我失去意識，醒來時已經被醫生檢查並吊起鹽水，慢慢才恢復返意識。
呢一場比賽，冇 PB、冇華麗數據。只有血肉之軀嘅掙扎，只有意志同信念嘅勝利。當身體完全崩潰時，意志仍然可以帶你走多一步，去到你從未想像過嘅極限。
🙏 最後，我想由衷感謝：
家人：陪伴、包容與不斷相信我；
朋友與隊友：在訓練日子給我動力，賽前賽後的支持令我感到溫暖；
同場的隊友與陌生跑友：在我最脆弱的時候牽著我、讓我講著廢話使我保持清醒；
贊助商與所有鼓勵我的人：你們的信任讓我可以把夢想走到世界舞台；
Buy Me a Coffee 支持者：你們的心意，成為我前行的力量與燃料。
如果你睇完覺得心痛、覺得感動，我會明白。這正是我想分享的：真正嘅 Ironman 不只係時間和排名，而係一段用靈魂完成的旅程。多謝你哋同我一齊見證。
#IronmanWorldChampionship2025 #Triathlon #Tri852 #garysir #SwimBikeRun #NeverGiveUp #SoulOverBody