Як панкі з Венесуэлы сталі зоркамі і чым ...

Як панкі з Венесуэлы сталі зоркамі і чым усё гэта скончылася?

Oct 31, 2024
316

Папярэдняя ваенная дыктатура ў Венесуэле абрынулася ў далёкім 1958 годзе, і пасля гэтага ў амерыканскай краіне сталі будаваць сацыялізм. Пануючыя партыі змагаліся за ўплыў: Дэмакратычная дзея і Сацыял-хрысціянская партыя напераменку ўзначальвалі ўрад краіны і паступова занялі цэнтрысцкія пазіцыі. Гэтае супрацьборства не прывяло ні да чаго добрага: да пачатку васьмідзесятых Венесуэла адчувала востры сацыяльна-эканамічны крызіс, людзі былі незадаволеныя карумпаваным урадам і жылі ў стане апатыі. Ніхто не спадзяваўся, што нешта ў краіне можа памяняцца да лепшага. Цяжкі венесуэльскі застой прывёў да з'яўлення ў краіне новых лідараў і гульцоў. І тады завіравала!

image

Мы толькі можам уявіць, як адчуваюць сябе людзі ў такі перыяд ажыўлення: васьмідзясятыя ў Венесуэле сталі перыядам надзей і яркіх пробліскаў творчасці, якія заўсёды суправаджаюць вось такія сацыяльна-палітычныя змены. Адным з такіх стаў гурт Sentimiento Muerto.

image

У 1981 годзе ў венесуэльскай сталіцы, Каракасе, маладыя хлопцы, натхнёныя англійскім панк-рокам і постпанкам, пачалі граць песні анархісцкага зместу. Іх сэнс лёгка зразумець нават чалавеку, які не валодае іспанскай мовай: El sistema, USA te usa… 

Але каб зразумець кантэкст, крыху адматаем і вернемся у самы пачатак 70-х — у дзяцінства гітарыста Карласа Траконіса, які стаў вядома па мянушцы Каяё.

image

Каяё нарадзіўся ў 1968 годзе ў шматдзетнай сям’і. Такіх у Каракасе было шмат, і нічога выбітнага ў біяграфіі будучай рок-зоркі не было. Хіба што ўспаміны яго сясцёр можна прывесці як сведчанне таленту хлопца. 

Па словах яго сястры Алісіі, Каяё пачаў маляваць, перш чым размаўляць, ён спрабаваў нешта растлумачыць, дапамагаў сабе пальцамі, маляваў у паветры. Яго сястра Флор распавядала вось што:

У 2 гады я ўпершыню ўключыла яму альбом Led Zeppelin, ён звар’яцеў ад гэтага альбома, ён зноў і зноў прасіў мяне паставіць гэты альбом. 

Сам Каяё распавядаў у інтэрв’ю:

Усе мае браты маюць вельмі моцныя музычныя схільнасці. Наколькі я памятаю, у маёй хаце мае браты слухалі рок-н-рол — Хендрыкса і The Rolling Stones — або сальса-брава:  Маэла ці Гектар Лава. Гэта была мая музычная аснова.


Сястра Каяё Лурдэс пераехала жыць у Сан-Францыска прыкладна ў 1978 годзе і пачала слухаць джаз і класічную музыку, а калі яна вярнулася з адпачынку змененая панкам. Гэта зачапіла малога і перакуліла яго жыццё. 
image

Дык вось, вернемся ў 1981 год. Гітарыст Каяё, вакаліст і клавішнік Пабла Дан’іна, бубнач Альберта Кабельё, гітарыст Луіс Палео ствараюць гурт Sentimiento Muerto (Мёртвае пачуцце). 

Мы вырашылі стварыць гурт, у яго ўваходзілі Альберта на барабанах, Пабла на вакале, я на басу і Луіс Палео на гітары, ніхто з нас паняцця не меў, што ён робіць на сваім інструменце... Ніхто з нас не меў ніякіх музычных ведаў. Мы проста разам складалі песні

— так апісваў Каяё пачатак сваёй музычнай кар’еры. 

image

У поўнай адпаведнасці з канонамі панк-культуры малады гурт распаўсюджваў сваю музыку на канцэртах, раздаючы публіцы самаробныя касеты. Сапраўдны падпольны рок з усімі атрыбутамі! Праз некаторы час Sentimiento Muerte сталі культам. Як гэта здарылася? 

image

Хлопцы стваралі коміксы з удзелам міфічных персанажаў — сярод іх, напрыклад, быў доктар Сенціміенто Муэрто, які нібыта працуе антыкарупцыйным назіральнікам у цэнтрабанку Венесуэлы. А графіці з лагатыпам калектыва з'яўляліся на вуліцах і ў прыбіральнях гандлёвых цэнтраў, ствараючы ілюзію масавасці сярод прыхільнікаў гурта — падавалася, што ўвесь Каракас ведае пра Sentimiento Muerte! 

image

Пра гурт з Каракаса загаварылі сур'ёзна: з андэграўнднай з'явы Sentimiento Muerto паступова вырасталі ў вялікі па венесуэльскіх мерках праект.

Шмат якія песні венесуэльцаў - Manos Frías, Educación Anterior, Quan vendrás - станавіліся вядомымі ў субкультурных колах яшчэ да запісу ў студыі і нават трансляваліся на камерцыйных радыёстанцыях. У выніку гурт даў два аншлагавыя канцэрты на вялікай пляцоўцы Тэатр Мата дэ Кока, і запіс гэтых выступаў трапіў да іспанца Мігеля Рыяса — дужа вядомай асобы ў лацінскім свеце.

image

Яго называлі каралём твісту, а песня Ode to Joy стала сусветным хітом. Дык вось, Рыяс паслухаў самапальныя запісы Sentimiento Muerto і настолькі закахаўся ў гурт, што запрасіў іх на серыю канцэртаў у Іспаніі. А там хлопцаў чакаў фурор!

image

Іспанскія крытыкі сур'ёзна абураліся: як гэта Sentimiento Muerto яшчэ не падпісаў буйны лэйбл? І яно спрацавала! Адразу пасля вяртання з Еўропы гурт падпісаў кантракт з SonoRodven на іх першы запіс, у выніку з'явіўся альбом El amor ya no existe, спрадзюсаваны аргенцінцам Фіта Паэсам. Што праўда, Каяё быў не дужа задаволены гэтай супрацай. 

Першапачаткова альбом павінен быў прадзюсаваць Андрэс Каламара, але пасля пары сесій запісу яго замяніў Паэс. Каяё ў інтэрв’ю не стрымліваў сябе:

Калі б Каламара прадзюсаваў наш першы альбом, я думаю, ён быў бы нашмат лепш, чым з Фіта Паэсам. У музычным плане гэты хлопец цудоўна разумеў нас, але мы не разумелі яго.

Але нават пры гэтым альбом стаў дужа папулярным. Наколькі? Да 2006 года El amor ya no existe быў самым прадаваным рок-запісам Венесуэлы. Гэта быў феерычны поспех! Уявіце сабе, у хлопцаў упершыню ў гісторыі Венесуэлы з'явіліся свае групіз, якія суправаджалі гурт на гастролях. А гастралявалі яны шмат. 

Праз два гады Sentimiento Muerto выдалі новы альбом Sin sombra no hay luz і знялі на кліп на песню Payaso. Вось ён — каля культавага амерыканскага клубу CBGB, дзе венесуэльскі гурт нават даў канцэрт. Гэтае відэа ў выніку круцілі па MTV!

Карацей, хлопцы з Каракаса пераўтварыліся ў сапраўдных рок-зорак. Падавалася б, наперадзе светлая будучыня і выхад на міжнародны ўзровень. Але ў такіх вось гісторыях часта нешта ідзе не так. 

image

У 1991 годзе выйшаў апошні альбом гурта Infecto de effect, спрадзюсаваная аргентынцам Марыяна Лопесам. 10 верасня 1992 года на сустрэчы ў Эль-Леонэ, вядомай канцэртнай зале Каракаса, Каяё, Пабла і Себасцьян разам з Хеленай Ібара, менеджэрам гурта, вырашылі распусціць Sentimiento Muerto. «Непрымірымыя канцэптуальныя і мастацкія супярэчнасці» — вось так усё было апісана ў артыкуле ў мясцовай газеце.  Пасля гэтага выйшаў зборнік Fin del corazón 1981–1993, але гэта было толькі абавязацельства гурта перад лэйблам.

Музыканты разыйшліся хто куды. Цікавей за ўсё было назіраць за развіццём музычкай кар’еры Каяё. Ён разам з Эктарам Касцільё і Себасцьянам Араужа стварыў новы гурт Dermis Tatu. Ён даволі моцна адрозніваўся ад Sentimiento Muerto — яшчэ больш змрочны і гранжавы. 

Але праіснаваў Dermis Tatu нядоўга. І Каяё стварыў новы калектыў PAN — ён стаў апошнім у біяграфіі таленавітага гітарыста.

Каяё памёр у сераду, 17 лістапада 1999 года, за некалькі гадзін да прэзентацыі новага альбома PAN. Ён памёр у клініцы Авілы, куды яго перавялі з дому з-за спынення дыхання ў выніку перадазіроўкі гераіну.
image

Удзельнікі Sentimiento Muerto за выключэннем Касцільё сабраліся разам у 2005 годзе на канцэрце памяці свайго былога паплечніка. 

Такая натхняльная гісторыя з сумным фіналам. 

Дзякуй, што падтрымліваеце канал, і за тое, што прачыталі гэты матэрыял! Я спадзяюся, што вам спадабалася гісторыя і музыка Sentimiento Muerto. Заставайцеся з «Міністэрствам сепультуры» - у наступным месяцы я прынясу вам яшчэ адзін цікавы сюжэт. Да сустрэчы!

Ваш міністр

Gefällt dir dieser Beitrag?

Kaufe Aliaksandr Charnukha einen Kaffee

Mehr von Aliaksandr Charnukha