Welcome to Bloodywood. Як юрыст і талент ...

Welcome to Bloodywood. Як юрыст і талент-мэнаджар зрабілі індыйскі метал папулярным

Mar 31, 2025
274

Bloodywood пачалі свой шлях як «парадыйны гурт», выкладваючы на ​​YouTube метал-каверы папулярных балівудскіх песень. Праз шэсць гадоў яны аб'ехалі каля 90 краін, выступілі на Wacken Open Air і іншых сусветна вядомых фестывалях, і сталі першым індыйскім метал-калектывам, якія трапіў ў чарты Billboard. Сёння я прынёс вам гісторыю пра тое, як жарт перарос у гісторыю поспеху, а карпаратыўны юрыст і талент мэнаджар сталі сусветнымі зоркамі. 

image

Індыя — адно з самых супярэчлівых месцаў на планеце: найбагацейшая культура, шматвяковыя традыцыі і адзін з найбуйнейшых ВУП у свеце з аднаго боку і гуманітарныя катастрофы — з іншага. Карупцыя, рэлігійныя канфлікты, каставая сістэма, адсталая сістэма аховы здароўя — усе гэтыя праблемы не маглі не паўплываць на настроі індыйцаў. Любы канфлікт адбіваецца ў мастацтве, і хутчэй за ўсё на тое, што адбываецца, рэагуе музыка.

Метал-сцэна ў Індыі: складаны шлях да прызнання

Калі кажуць пра Індыю, у галаву прыходзіць Балівуд, традыцыйная класічная музыка, рага і народныя матывы, але ніяк не метал. Аднак у краіне існуе дастаткова актыўная цяжкая сцэна, хоць і не такая маштабная, як у Еўропе ці ЗША. Гурты кшталту Demonic Resurrection, Kryptos і Bhayanak Maut упарта спрабуюць даказаць, што індыйскі метал можа канкураваць з сусветнымі стандартамі.

image

Індыйская метал-сцэна бярэ свой пачатак у 1980-х гадах, калі на сцэну ўварваліся такія хэві-метал гурты, як Millennium. У той час метал працягваў разглядацца як «андэграўндны рух», які існуе на перыферыі мэйнстрыму. Слухачоў было мала, гуказапісвальныя лэйблы было цяжка знайсці, а гастролі ў асноўным мелі на ўвазе выступленні на студэнцкіх фестывалях.

Але маленькія клубы кіпелі энергіяй. Канцэрты наведвалі ў асноўным студэнты і траслі галовамі пад індыйскі андэграўнд усю ноч.

Трэба было там быць, каб дакладна зразумець, як у тыя часы кіпела сцэна, – кажа ў інтэрв’ю ВВС Сахіл Махіджа з Demonic Resurrection, хэві-метал гурта, заснаванага праз шмат год, пасля гэтых падзей. Калектыў пачаў сваю дзейнасць у 2000 годзе і цяпер лічыцца папулярызатарам металу ў краіне. 

З васьмідзясятых мала што змянілася. Праблемы ў індыйскіх метал-гуртоў дагэтуль значныя: адсутнічае развітая інфраструктура, лэйблы не зацікаўлены ў прасоўванні цяжкай музыкі, а колькасць канцэртных пляцовак вельмі абмежавана. 

Калі мы толькі пачыналі, у Нью-Дэлі практычна не было месцаў, дзе можна было граць наш стыль музыкі. Людзі проста не верылі, што метал можа быць папулярным тут, — расказваў вакаліст Джаянт Бхадула ў інтэрв'ю Rolling Stone India.

Апроч гэтага, металічныя канцэрты часам сутыкаюцца з ціскам з боку кансерватыўных колаў. У 2015 годзе гурт Dhwesha зведаў пагрозы з-за выкарыстання індуісцкіх тэкстаў у сваіх песнях. У 2018 годзе ўлады штата Махараштра забаранілі канцэрт Demonic Resurrection, спаслаўшыся на "прапаганду сатанізму". У 2010 годзе гурт Crypted не змог выступіць у Бангалоры, таму што мясцовыя ўлады адмовіліся выдаць дазвол, спасылаючыся на "магчымае распальванне гвалту».

Тое самае было да пэўнага моманту і з Bloodywood. 

Нам казалі, што мы занадта заходнія для Індыі і занадта індыйскія для Захаду, але мы вырашылі не звяртаць на гэта ўвагі, – кажа адзін з удзельнікаў гурта Рахул Кэр.

Нягледзячы на ​​гэтыя цяжкасці, метал-сцэна ў Індыі працягвае расці, і Bloodywood сталі адной з самых прыкметных гуртоў, якія адкрылі гэтую музыку для шырокай аўдыторыі.

image

Пачатак шляху: ад кавераў да сусветнага поспеху

Bloodywood пачаліся ў 2016 годзе, калі гітарыст і прадзюсар Каран Каціяр пакінуў працу карпаратыўнага юрыста і вырашыў стварыць YouTube-канал, дзе выкладваў метал-каверы на балівудскія хіты.

Неўзабаве да яго далучыўся вакаліст Джаянт Бхадула — талент мэнэджар з інтэртэйнмент-кампаніі, і хутка дуэт сфарміраваў сфарміраваў сваю ідэалогію: «знішчыць поп-песні».

— Пенджабская музыка настолькі блізкая да металу, наколькі гэта магчыма, калі вы думаеце пра індыйскую традыцыю. Яна гучная, мэтанакіраваная і не стрымліваецца, – сказаў Катыяр у інтэрв'ю SBS Punjabi. — Мы вырашылі змяшаць пенджабскую музыку з металам, таму што яны сапраўды добра працуюць разам. Плюс, прыйшоў час, каб нехта гэта зрабіў.

Першапачаткова ідэя заключалася ў тым, каб зрабіць метал больш даступным для індыйскай аўдыторыі. 

Мы хацелі паказаць, што цяжкая музыка можа быць блізкая кожнаму, — гаворыць Бхадула ў інтэрв'ю Metal Hammer.

Яны пачалі з кавераў на папулярныя індыйскія песні, надаючы ім магутнае металічнае гучанне.

Пародыі на класіку сталі з часам візітоўкай гурта. Вось вам, напрыклад, індыйская версія песні Heavy гурта Linkin Park. У каментах нават пісалі, што кавер круцейшы за арыгінал! 

Дайшло да таго, што Bloodywood выклалі на сваім Bandcamp цэла альбом кавераў пад назвай «Anti-Pop vol.1». 

image

Пасля быў яшчэ адзін бэнгер. Bloodywood пераасэнсавалі хіт 90-х гадоў "Tunak Tunak" караля пенджабскай поп-музыкі Далера Мендзі сваімі жорсткімі гітарнымі рыфамі і змрочным вакалам. І ў выніку песня таксама стала вялікім хітом у сацыяльных сетках.

Аднак з часам музыкі зразумелі, што трэба рухацца ў бок арыгінальнага матэрыялу. Гэта прывяло да распрацоўкі іх унікальнага стылю, у якім спалучаюцца хэві-метал, рэп і індыйская народная музыка. 

Калі мы ўпершыню паспрабавалі выкарыстоўваць дхол у песні, я зразумеў, што мы знайшлі нешта асаблівае, — успамінае Каціяр.

Дхол — гэта традыцыйны індыйскі музычны інструмент. Вялікі бубен, які дадае і без таго гучнай музыцы дадатковы аб’ём і драйв. 

image

Гурт пачаў супрацоўнічаць з анлайнавым кансультацыйным сайтам Hope Therapy і выпусціў песню Jee Veerey, якая была прысвечана барацьбе з дэпрэсіяй і псіхічнымі захворваннямі. 

У выніку музыканты пераасэнсавалі папулярны пенджабскі трэк Baari Barsi у хардкорнай хэві-метал-версіі і назвалі яго Ari Ari. Песня выбухнула і зрабіла Bloodywood сапраўднымі зоркамі.

Як Bloodywood сталі папулярнымі?

Вось менавіта пасля гэтага ўсё закруцілася. Ari Ari стаў вірусным, набраўшы мільёны праглядаў на YouTube. Так у жыцці Bloodywood здарыўся першы еўрапейскі тур "Raj Against the Machine" у 2019 годзе, які прайшоў з аншлагамі.

Прычым тур быў дастаткова спецыфічны. Справа ў тым, што музыканты не мелі падтрымкі буйных лэйблаў і фундатараў, таму фінансавалі гэтую вандроўку самастойна, прадаючы мерч і збіраючы грошы праз краўдфандынг. 

Мы літаральна жылі ў фургоне, харчаваліся локшынай хуткага гатавання, але гэта быў лепшы перыяд у нашым жыцці, — распавядаў пра гэты досвед Рахул Кэр.

Тур прайшоў надзвычай крута, і ў выніку музыканты атрымалі запрашэнне на культавы Wacken.

Уявіце сабе, што гэта значыць для музыкантаў, якія яшчэ ўчора даядалі дашырак у сваім фургончыку!

Калі мы выйшлі на сцэну Wacken Open Air, я ледзь не расплакаўся ад усведамлення, як далёка мы зайшлі, – успамінае Бхадула.

Bloodywood магутна працуюць з сацыяльным аспектам сваёй музыкі. Яны карыстаюцца ўплывам, каб размаўляць на важныя тэмы. Я ўжо распавядаў вам пра супрацоўніцтва з Hope Therapy. Уявіце, што гурт яшчэ і раздаваў бясплатна анлайн-сесіі псіхалагічнай дапамогі. Ці вось яшчэ прыклад. Bloodywood папрасілі сваіх прыхільнікаў на Patreon дапамагчы падтрымаць мясцовую няўрадавую арганізацыю The Posh Foundation, якая даглядае бяздомных жывёл, і ахвяравалі частку заробку ад тура на куплю машыны хуткай ветэрынарнай дапамогі для гэтай арганізацыі.

image

Але вось вам сапраўды жудасная гісторыя. У 2022 годзе гурт выпусціў песню "Dana-Dan", якая ўзнімае праблему сэксуальнага гвалту ў Індыі. Яна была натхнёная сумна вядомым выпадкам групавога згвалтавання ў Дэлі ў 2012 годзе. Тады 23-гадовая студэнтка медыцынскага каледжа Джоці Сінгх Пандэя і яе сябар вярталіся з кінасеанса, калі іх зацягнулі ў прыватны аўтобус. Унутры знаходзіліся шасцёра мужчын, якія жорстка збілі хлопца і падвергнулі дзяўчыну груповаму згвалтаванню, выкарыстоўваючы металічны прут. Затым іх выкінулі з аўтобуса, пакінуўшы паміраць на абочыне.

Джоці атрымала сур'ёзныя траўмы, яе кішэчнік быў моцна пашкоджаны. Урачы на ​​працягу двух тыдняў змагаліся за яе жыццё, але 29 снежня яна памерла ў бальніцы ў Сінгапуры. Гэтае злачынства выклікала масавыя пратэсты па ўсёй Індыі, людзі патрабавалі ўзмацнення жорсткасці пакаранняў за сэксуальны гвалт. Вінаватыя былі арыштаваныя: чацвёра з іх былі прысуджаныя да смяротнага пакарання і пакараныя ў 2020 годзе, адзін здзейсніў самагубства ў турме, а шосты, быўшы непаўналетнім, атрымаў мякчэйшы прысуд.

Рауль Керр, рэпер Bloodywood, у інтэрв'ю Louder Sound казаў пра песню так:

Мы хацелі стварыць не проста песню, а крык душы, які выкажа гнеў і боль людзей, якія сутыкнуліся з гвалтам. Гэта не проста музыка, гэта зброя ў барацьбе за справядлівасць.

У "Dana-Dan" гурт выкарыстоўвае агрэсіўны вакал і магутныя гітарныя рыфы, а ў тэксце гучыць заклік да барацьбы з гвалтаўнікамі і бяздзейнасцю ўладаў. Гэтая песня стала гімнам барацьбы супраць сэксуальнага гвалту ў Індыі і атрымала велізарны водгук у слухачоў.

Пасля поспеху "Ari Ari" і "Dana-Dan" гурт працягнуў выпускаць арыгінальныя кампазіцыі. Іх дэбютны альбом "Rakshak" выйшаў у 2022 годзе і атрымаў захопленыя водгукі ад крытыкаў.

image

Kerrang! пахваліў больш «сур'ёзны» тон гурта (у параўнанні з іх каверамі) і сказаў, што «такога гучання цяпер нямані ў кога ў свеце».

Rakshak у роўнай ступені радасны, люты і энергічны, і яго стваральнікі, падобна, збіраюцца стаць першым індыйскім метал-гуртом, які сапраўды выбухне ў сусветным маштабе.

Metal Hammer пахваліў «уражваючы музычны дыяпазон гурта, які пры гэтым застаецца верным сваім родным караням». 

Калі гэта тое, чаго Bloodywood могуць дасягнуць самастойна, уявіце, куды яны могуць пайсці з лэйблам за спінай. Вядома, гэта толькі пытанне часу.

Новы альбом гурта выйшаў зусім нядаўна — у мінулую пятніцу. Ён называецца Nu Delhi і на ім можна заўважыць самыя нечаканыя дуэты. Як вам, напрыклад, фіт з Babymetal? 

— Мы заўсёды стараемся адстойваць тое, што нам блізка. З дапамогай Nu Delhi мы хацелі даць свету ведаць, што ў Індыі ёсць квітнеючая музычная сцэна - не толькі металічная, - якая не саступае таму, што адбываецца ў свеце. Першы сінгл, Nu Delhi, - гэта наша любоўнае пасланне гэтаму гораду, — распавядалі музыкі ў інтэрв’ю Kerrang.

Ну крута ж, што тут яшчэ можна дадаць!

image

Bloodywood не проста папулярызавалі метал у Індыі — яны змянілі ўяўленне аб тым, якім можа быць цяжкі гук. Яны даказваюць, што спалучэнне культурных каранёў з сучаснай агрэсіўнай музыкай можа гучаць свежа і актуальна. Іх выступленні становяцца сапраўднымі шоу, дзе традыцыйныя дхолы і флейты пераплятаюцца з магутнымі рыфамі і лютым вакалам. Абавязкова паслухайце гэтых рабят, яны таго вартыя!

Дзякуй, што падтрымліваеце канал, і за тое, што прачыталі гэты матэрыял! Я спадзяюся, што вам спадабалася гісторыя і музыка Bloodywood. Заставайцеся з «Міністэрствам сепультуры» - у наступным месяцы я прынясу вам яшчэ адзін цікавы сюжэт. Да сустрэчы!

Ваш міністр

¿Te gusta esta publicación?

Comprar Aliaksandr Charnukha un café

Más de Aliaksandr Charnukha