Вышэйшая матэматыка. Як дзяўчаты з Кіёта ...

Вышэйшая матэматыка. Як дзяўчаты з Кіёта перайначылі ўяўленне пра папулярную музыку

Aug 29, 2024
412

За сапраўднай музычнай экзотыкай мы сёння з вамі выправімся ў Японію — краіну, дзе можна знайсці самыя незвычайныя, аўтэнтычныя і яскравыя гурты. Іншая планета! Калі ніколі не паглыбляліся ў гэты чароўны свет, то вас чакаем шмат цікавых адкрыццяў. 

Суворы нойз

Ці пяшчотны і сумны, нібы зроблены са смугі, шугейз

Ці нават вось такая неспадзяванка — японскі гурт Matryoshka, першы альбом мае польскую назву Zatracenie, а лірыка — англамоўная. Але не гэта галоўнае. Проста паслухайце прыгажэнную песню Evening gleam between clouds. Нават калі ў вас няма сэрца, яно абавязкова ў вас з’явіцца пасля такой пяшчоты. 

Але сёння зусім пра іншы музычны накірунак — складаны гікаўскі мат-рок і дзяўчат з Кіёта, якія нібыта нарадзіліся з гітарамі ў руках. Гэта гісторыя гурта tricot. Вы яго абавязкова палюбіце! 

image

Спачатку зацаніце вось гэтае відэа. 

Пачынаецца ўсё як вельмі разняволены джэм перад фестывальнай аўдыторыяй. Нібыта рабяты проста сабраліся парэпетаваць — настолькі ўсё лёгка і нязмушана ў іх атрымліваецца. Але чым далей, тым больш зразумела становіцца: кожная нота, кожны рух у гэтым трэку на сваім месцы, а сам гурт настолькі сыграны паміж сабой, што стаў адзіным жывым арганізмам. Гэтае спалучэнне меладычнасці, матэматыкі, паламаных ушчэнт рытмаў і паліфаніі сапраўды ўражваюць. Не дзіва, што tricot сталі папулярнымі спачатку ў роднай Японіі, а потым і па ўсім свеце. Яны гастралявалі па Брытаніі разам з Pixies і рэгулярна траплялі ў японскія і амерыканскія чарты, а слухаць іх — гэта заўсёды сюрпрыз і неспадзяванка, захапляльнае падарожжа па самых нечаканых музычных рашэннях і спалучэннях. 

image
Ікумі Накадзіма, Матока Кіда і Хіромі Саганэ сустрэліся ў Кіёта. У кожнай з 20-гадовых дзяўчат ужо быў музычны досвед. 

Накадзіма яшчэ ў школе пісала песні пра каханне ў свой нататнічак, а пасля спявала ў бясконцах і безыменных лакальных гуртах.

image

Матока ў 14 гадоў упершыню узяла ў рукі гітару свайго бацькі, а ў 18 ужо пісала песні.

image

Саганэ ўвогуле зацікавілася музыкай у выпускным класе школы, калі разам з сябрам пайшла на лакальны канцэрт — і ў выніку запісалася ў музычны клуб і ўзяла ў рукі бас-гітару.  

image

Яны гралі ў розных гуртах: бас-гітарыстка Саганэ ў родным Кіёта, а вакалістка-гітарыстка Накадзіма і гітарыстка Саганэ ў суседняй прэфектуры Сіга. Гэта быў 2010 год, і ў мяне для вас ёсць адмысловы жарт пра чалавека, які ўсё жыццё думае, што ўмее граць на гітары, а потым прыходзяць 20-гадовыя японскія дзяўчаты і руюнуюць гэтае ўяўленне. 

Ад пачатку свайго існавання tricot былі трыа вось у такім складзе: дзве гітары, бас і вакал. Але праз год да іх далучыўся бубнач Кадзутака Камакі, і разам яны заснавалі ўласны лэйбл Bakuretsu Records, а пасля на ім жа выдалі дэбютны альбом T H E.

 image

Вось вам трэк POOL з яго.

Зацаніце, сколькі энергіі ў гэтай музыцы — у ёй спалучаецца поп-меладызм, вельмі шчыльнае гучанне і вельмі нестадартны падыход да кампазіцыі. Слухаць такі матэрыял — суцэльнае задавальненне, нават калі вы ніколі не былі прыхільнікам мат-року. 

Tricot заўважылі адразу. Японская кампанія Oricon, якая займаецца статыстыкай музычнай індустрыі Японіі, пасля выхаду T H E апублікавала дадзеныя: паводле іх, альбом трапіў на 18 радок у штотыднёвым хіт-парадзе. Вельмі круты вынік для новага гурта ў краіне з вельмі развітай музычнай індустрыяй. Але і матэрыял быў адпаведны! 

Вось вам кампазіцыя artsick, у якой боль заўважны ўплыў не толькі матэматыкі, але і павольнага і атмасфернага дрым-попу. Спалучэнне проста чароўнае. 

Праз год з гуртом развітаўся бубнач Камакі, і tricot пачалі выступаць з сесійнымі музыкантамі. І прыкладна ў гэты ж час на калектыў звярнула ўвагу еўрапейская і амерыканская прэса. Пра дзяўчат з Кіёта пачалі пісаць NME і Rolling Stone. Яны захапляліся кліпамі tricot і называлі сапраўдным музычным адкрыццём. Шмат хто казаў, што песні гурта даволі складаныя, але самі дзяўчаты так не лічаць. 

«Мы не ставім перад сабой задачу ствараць складаныя песні, але людзі кажуць, што наша музыка складаная. У гэтых песнях шмат элементаў і прыёмаў з розных жанраў, што можа збіць з панталыку. Але нам проста падабаецца пісаць песні», — гэта цытата з вельмі лаканічнага (першага на анлійскай мове) інтэрв’ю NME. Адказы для яго перакладала менеджар гурта. 

Цікава, што сярод крыніц натхнення дзяўчаты называюць Red Hot Chilli Peppers. Даволі нечакана, праўда? Але вы паслухайце, напрыклад, вось гэтую песню! 

Другі альбом гурта A N D выйшаў у 2015 годзе, і адразу пасля гэтага tricot паехалі ў тур по Японіі, Паўночнай Амерыцы і Еўропе. Песні гурта сталі яшчэ больш змястоўнымі і складанамі, але не згубілі абаяльнасці і аўтэнтыкі — проста змянялася мысленне Накадзіма, Кіда і Саганэ і пашыраліся межы іх магчымасцяў. Гэта вельмі цікавае адчуванне, калі ты слухаеш грувасткую і перанасычаную музычнымі прыёмамі і рэферансамі кампазіцыю, але пры гэтым разумееш, што ў ёй усё на сваіх месцах і гэтая звышзмястоўнасць не перашкаджае ўспрыманню музыкі. 

Праз некаторы час да гурта далучыўся бубнач Юсукэ Ёсіда, які выступаў разам з tricot сесіёншчыкам. З таго часу склад гурта не мяняўся. 

У дыскаграфіі tricot можна калупацца бясконца. У іх хапае шыкоўных лайваў і неверагодных трэкаў, якія хочацца трымаць на рэпіце, каб атрымаць асалоду ад кожнага нюансу.

Шчыльны, але не перанасычаны гук, незвычайнае спалучэнне вакальных партый і інструментаў — нібыта At the Drive-In запісалі саўндтрэк да неіснуючага анімэ. Уявіце сабе студэнта, якія настолькі добра засвоіў курс выйшэйшай матэматыкі, што можа простымі словамі растлумачыць самыя складаныя рэчы. Вось вам кароткае апісанне гурта tricot.

Вось вам яшчэ крыху музыкі гэтых крутых японскіх музыкантаў. 

Адзін з маіх любімых трэкаў — おまえ. Вельмі інтэнсіўны і драйвовы, шчыльны і пры гэтым неверагодна меладычны. Такую музыку маглі стварыць толькі ў Японіі! 

А вось найпрыгажэйшая песня 暴露 з непаўторным вайбам. 

Tricot эксперыментуюць увесь час. У за гэтым вельмі цікава назіраць. Напрыклад, у 2021 годзе яны далі вельмі незвычайнае маўклівае шоў у Осацы. Вось як пра яго распавядалі дзяўчаты

Да каранавіруса нашы шоу былі перапоўнены, але на гэты раз, калі і выканаўцы, і гледачы выконвалі пэўныя ўмовы, напрыклад, не размаўлялі, гэта быў унікальны для нас досвед. 

Гледачы не маглі гаварыць або пляскаць у далоні, таму, хаця гэта было шоў з жывой аўдыторыяй, мы не маглі па-сапраўднаму адчуць іх рэакцыю, але, з іншага боку, яны маглі назіраць за намі, паколькі мы сапраўды засяродзіліся на сваім выступленні.

Цікавая канцэпцыя, праўда? Tricot папрасілі гледачоў апрануцца ў чорнае адзенне і захоўваць цішыню цягам усяго канцэрту. Вось як гэта выглядала. 

Цяпер музыка tricot часта становіцца саўндтрэкам да фільмаў. Напрыклад, серыял Liar

Ці драма «Праклён вясны», у якой прагучала песня INAI

Вельмі раю вам паглыбіцца ў чароўны свет гэтай музыкі. У ёй вы знойдзеце ўсё: драйв і энергію, пяшчоту і меланхолію, складаныя рытмы і яскравыя мелодыі. Непаўторны вайб загадкавай Японіі ад дзяўчат з Кіёта — няхай гэты гурт стане пярлінай у вашай калекцыі музычны адкрыццяў.  

Дзякуй, што падтрымліваеце канал, і за тое, што прачыталі гэты матэрыял! Я спадзяюся, што вам спадабалася гісторыя і музыка tricot. Заставайцеся з «Міністэрствам сепультуры» - у наступным месяцы я прынясу вам яшчэ адзін цікавы сюжэт. Да сустрэчы!

Ваш міністр

Подобається цей допис?

Купити для Aliaksandr Charnukha каву

Більше від Aliaksandr Charnukha