Як аўстралійскі гурт з гаража паламаў за ...

Як аўстралійскі гурт з гаража паламаў законы папулярнай музыкі

Dec 30, 2024
304

Гэтая гісторыя настолькі нецікавая, што магла б прэтэндаваць на адпаведную ўзнагароду на конкурсе нецікавых гісторый. Сямёра аўстралійскіх сяброў вучыліся ў школах Мельбурна, Дэлінквіна і Джылонга і тусаваліся разам. Пасля трое з іх паехалі вучыцца ў тэхналагічны ўніверсітэт, а ў вольны час збіраліся ўсёй тусоўкай і джэмавалі ў гаражы. Ну вось і ўсё. Хто б мог падумаць, што менавіта так пачнецца самае захапляльнае і неверагоднае падарожжа ў сучаснай папулярнай музыцы і квіткі на канцэрты аўстралійскіх сяброў будуць разлятацца па ўсім свеце за лічаныя гадзіны? 

image

Гэта гісторыя парадоксаў і сапраўднай любові да музыкі. Яны прымусіць вас паверыць у тое, што нават у цяперашнім свеце можа існаваць гурт King Gizzard & The Lizard Wizard — і яго будуць ведаць, шанаваць, захапляцца менавіта такім: з грувасткай назвай, якую не кожны зможа паўтарыць, з бясконцай дыскаграфіяй з 27 альбомаў за 12 год, са стылістычнай мяшанкай, праз якую нават складана вызначыць тэгамі межы гурта. Гэта проста доказ простай праўды — музыка па-над усім. 
image

Усё тое, што я напісаў пра гісторыю гурта King Gizzard & The Lizard Wizard — большая частка іх біяграфіі. Сцю Макензі, Эмброўз Кені Сміт, Джоі Ўокер, Кук Крэйг, Лукас Скінер і Майкл Кавана збіраліся разам, каб паджэмаваць. Ніякіх планаў і амбіцый — проста тусоўка ў гаражы. Але аднойчы сябар безыменнага гурта прапанаваў хлопцам выступіць на сапраўднай сцэне. Яны не тое каб доўга думалі і пагадзіліся. Праблема была толькі ў тым, што назвы для афішы ў іх не было. Пачалі думаць. Самым працоўным варыянтам было Gizzard Gizzard, але пачаліся спрэчкі, бо адзін з удзельнікаў гурта дужа хацеў, каб у назве была песня Морысана Lizard King. Далей вы, напэўна, ужо здагадаліся: няхітрыя маніпуляцыі — і ў выніку на афішы з’явілася тое самае King Gizzard & The Lizard Wizard. 

image

Канцэрт у выніку прайшоў з такім поспехам, што назад дарогі ўжо не было. Давялося запісваць і выдаваць музыку. Але акрэсліць свае стылістычныя межы музыканты так і не змаглі, таму, як падчас джэмаў, сачынялі ўсяго патроху. Каб вы лепш разумелі канцэптуальныя межы King Gizzard & The Lizard Wizard, вось вам вытрымка з інтэрв’ю намінальнага франтмэна калектыву Сцю Макензі. 

Мы хацелі пісаць самыя простыя песні. Адзін акорд, ці парачка - калі пашанцуе. Адно-два словы. І ўсе навокал шумяць, як могуць, каб гэта не трэба было рэпетаваць. І каб калі мы захочам узяць у гурт новага ўдзельніка, мы маглі б навучыць яго ўсім песням секунд за 11

Ну і што з гэтага атрымалася? Захапляльная дыскаграфія, якая скача ад псіхадэліі і трэш-метала да спагеці-вестэрна, бугі і мікратанальнай музыкі. Не так цікава корпацца ў біяграфіі гурта, колькі ў яго музычнай спадчыне. King Gizzard & The Lizard Wizard гастралююць па ўсім свеце і іх называюць адным з найлепшых канцэртых гуртоў сучаснасці. Фанаты будуюць шматлікія тэорыі вакол творчасці аўстралійцаў і называюць дыскаграфію гурта Gizzverse. Ну вось вам і вынік аднаго бясконцага джэма недзе ў мельбурнскім гаражы!

Усё пачалося вось з гэтага альбома — 12 Bar Bruise. Зразумець па ім, што з сябе ўяўляе цяперашні King Gizzard & The Lizard Wizard, даволі складана, але некаторыя элементы знайсці можна: спецыфічнае гітарная гучанне, псіхадэлічная вокладка і хітрыкі, якія выкарыстоўваліся для запісу. Напрыклад, тытульны трэк запісваўся на пяць айфонаў, якія ляжалі ў адным пакоі, пры гэтым Сцю Макензі спяваў у адзін з іх. Не самы стандартны спосаб, праўда? 


image

Сцю Макензі, дарэчы, толькі намінальны франтмэн і самы вядомы ўдзельнік гурта, бо ўсе астатнія музыканты і вакалісты, і гітарысты, і клавішнікі адначасова і часам можна заблытацца, хто і якую ролю выконвае ў калектыве! Як фільтруюць шматслойную дыскаграфію самі ўдзельнікі, нават складана ўявіць, бо, напрыклад, у адным з апошніх тураў яны ні разу не паўтарыліся з сэт-лістом. 

Дэбютны альбом гурта стаў даволі папулярным і гэта быў моцны імпульс для King Gizzard & The Lizard Wizard. Але як гурт вырашыў замацаваць гэты поспех? Ён выдаў Eyes Like the Sky — аўдыёкнігу ў стылі спагеці-вестэрн. Бацька аднаго з удзельнікаў гурта начытаў гісторыю пра засваенне Дзікага Захаду, а гурт аздобіў гэта ўсё інструменталам. Ну як вам? Які яшчэ гурт у свеце вырашыўся б на такое? 

Проста трэба разумець, што King Gizzard & The Lizard Wizard не нацэлены на поспех. Музыканты граюць музыку, якая ім падабаецца, і могуць дазволіць сабе якія заўгодна эксперыменты. Таму следам за малацікавым Oddments можа ісці проста шыкоўны I’m In Your Mind Fuzz, запісаны ўсяго за два дні падчас гастроляў у ЗША. Ну вось уявіце: у гурта выходныя паміж канцэртамі, і музыканты проста здымаюць студыю і запісваюць там магутны канцэптуальны альбом пра кантроль над свядомасцю! 

Псіхадэлічны I’m In Your Mind Fuzz стаў прарыўным для гурта і цалкам лагічна было б працягваць гэтую музычную лінію, але King Gizzard & The Lizard Wizard зноў вырашылі гуляць не па правілах, таму наступныя запісы сталі самымі «лайтовымі» за ўсю гісторыю аўстралійцаў. 


image

«Quarters!» — з джазавамі рытмамі ў стылі Брубэка і мяккімі «сантанаўскімі» гітарамі. 

Paper Mâché Dream Balloon увогуле быў акустычным: 12 кампазіцый у духу фольку шасцідзясятых, якія хлопцы запісалі на ферме аднаго з удзельнікаў. 

Але гэта быў толькі пачатак, бо ў наступным годзе гурт выдаў самы цікавы альбом у сваёй дыскаграфіі — Nonagon Infitnity. У ім змясцілася столькі ўсяго, што хапіла б на дыскаграфію якога-небудзь брытанскага калектыву з пятага радка фестывля Гластанберы, а тут — прагрэсіўны рок, бугі-вугі, панк, трэш, краўт і ўсё гэта на адным альбоме. Я нават не ўяўляю, адкуль у гэтых хлопцаў столькі імпэту і натхнення, але яны ў чарговы раз перафармулявалі сябе і высветлілася, што King Gizzard & The Lizard Wizard аднолькава камфортна адчувае сябе ці не ва ўсіх жанрах рок-музыкі. 

Усе дзевяць песень на Nonagon Infitnity звязаныя паміж сабой як мелодыямі і рэфрэнамі, якія пераходзяць з адной кампазіцыі ў іншую. А яшчэ агульнай гісторыяй. Да таго ж, альбом спраектаваны як бясконцая пятля: кожны трэк пераходзіць у наступны, а канцоўка ў выніку аказваецца пачаткам. Фантастыка! 

image

Вяршыня, скажаце вы? А вось і не! Бо эксперыменты з формай і зместам працягнуліся. Вось вам прыклад — Flying Microtonal Banana, эксперымент гурта з мікратанальнай музыкай. Што гэта? Гэта калі розніца паміж двума суседнімі гукамі складае не паўтона, а чвэрць. З’ява, якая больш распаўсюджаная ва ўсходняй музыцы. Назву альбому дала зробленая спецыяльна на заказ гітара, якая была наладжаная акурат на мікратоны. 

Можна доўга размаўляць пра кожны альбом King Gizzard & The Lizard Wizard, бо ў кожным ёсць за што зачапіцца. І самае крутое: ты ніколі не здагадаешся, якім будзе наступны рэліз аўстралійцаў. 

image

Гэта можа быць фантастычны прог-рок Polygondwanaland

Ці трэш-метал Infest the Rats’ Nest, нібыта Хэтфілд, Хэмет і Ульрых вярнуліся ў гараж 

Ці блюз і бугі Fishing for Fishes

Ці зноў трэш-метал PetroDragonic Apocalypse; or, Dawn of Eternal Night: An Annihilation of Planet Earth and the Beginning of Merciless Damnation

Самае цудоўнае, гэта тая непасрэднасць, з якой аўстралійцы жанглююць музычнымі жанрамі і ствараюць свой унікальны сусвет. Бо хто яшчэ зможа вось так проста паламаць тое, што працуе, і стварыць на яго месцы зусім іншае, але такое ж крутое! 

image

Абавязкова пераслухайце дыскаграфію гурта. На гэта вам спатрэбіцца прыкладна два дні, калі слухаць бесперапынна, але гарантую: вы дакладна знойдзеце там нешта, ад чаго кайфанеце! 

Дзякуй, што падтрымліваеце канал, і за тое, што прачыталі гэты матэрыял! Я спадзяюся, што вам спадабалася гісторыя і музыка King Gizzard & The Lizard Wizard. Віншую вас з Новым годам і жадаю, каб у наступным было шмат добрай музыкі і добрых падзей. Заставайцеся з «Міністэрствам сепультуры» - у наступным месяцы я прынясу вам яшчэ адзін цікавы сюжэт. Да сустрэчы!

Ваш міністр

Ti piace questo post?

Offri un caffè a Aliaksandr Charnukha

Altro da Aliaksandr Charnukha