Культура на экспарт. Як манголы заманьва ...

Культура на экспарт. Як манголы заманьваюць турыстаў гарлавымі спевамі і драйвовым рокам

Nov 30, 2024
432

Уявіце сабе сітуацыю: чацвёра мангольскіх хлопцаў апынуліся закрытыя ў здымнай кватэры недзе ў Аўстраліі падчас локдаўну. Прычым хлопцы былі няпростыя, а сусветна вядомы рок-гурт. Што? Сусветна вядомы мангольскі гурт? У Аўстраліі? Так, менавіта. Каб неяк забіць час і не звар’яцець, музыканты пачалі рабіць сапраўдныя кулінарныя батлы і здымалі ўсё гэта для свайго YouTube-каналу прыкладна на мільён падпісчыкаў. Цяпер там каля 14 відэа пра мангольскую кухню ад суперзорак — вы самі можаце паспрабаваць прыгатаваць нешта незвычайнае і аўтэнтычнае: дакладна здзівіце гасцей і здзівіцеся самі. 

Дык як жа гэтыя хлопцы сталі вядомымі на ўвесь свет? І адкуль у іх такая прага да мангольскай традыцыі і аўтэнтыкі? Усё проста: яны зрабілі тое, чаго ніхто не рабіў дагэтуль — спалучылі народныя інструменты з рок-музыкай, дадалі туды сюжэты часоў Чынгіс-Хана і праспявалі ўсё гэта вельмі спецыфічным метадам. І літаральна з першых сінглаў праславіліся і сталі сусветнымі зоркамі. Сёння яны катаюцца з гастролямі па ўсім свеце, з імі робіць фіты вакаліст Papa Roach, Metallica адабрала іх для запісу свайго трыб’юта, і ўся сусветная прэса з захапленнем піша пра мангольскі гурт The Hu. Сёння вас чакае вельмі незвычайная і натхняльная гісторыя — абавязкова прачытайце!
image

Усё пачалося ў кансерваторыі ў мангольскай сталіцы Улан-Батары. Мясцовы выкладчык Баярмагнайн Дашдандог (паспрабуйце вымавіць, у мяне не атрымалася з першай спробы) пачакаў шукаць сярод студэнтаў таленавітых музыкантаў для свайго новага праекту.

image

Да гэтага Дашдандог працаваў з рознымі мангольскімі рок-гуртамі, але заўсёды гэта была калька заходніх калектываў. Цяпер яму захацелася аўтэнтыкі: Баярмагнайн адмыслова з’ездзіў у свой родны рэгіён — невялікае мястэчка на мапе бязмежнай Манголіі — і так натхніўся, што пачаў пісаць песні пра родную краіну і яе гераічную мінуўшчыну. Дашдандогу было амаль 50, і ён захацеў зрабіць тое, што да яго чамусьці ніхто яшчэ не рабіў у роднай краіне: спалучыць заходні падыход да папулярнай музыкі і сапраўдную мангольскую аўтэнтыку. 
image

Пошукі ўдзельнікаў новага гурта вяліся цягам сямі год, і ўрэшце рэшт Баярмагнайн знайшоў харызматычных і таленавітых музыкантаў. Так у 2016 годзе з’явіўся гурт The Hu. Так, ёсць цікавая фанетычная акалічнасць, дзякуючы якой можна пераблытаць манголаў з брытанскімі класікамі. Але метафізічнага дыялогу паміж The Who і The Hu на самой справе не было. Па-мангольску Hu азначае «чалавек» у шырокім сэнсе — хутчэй нават «чалавечая істота» — і адсылае да тэматыкі песень гурта. 

image

Зараз гэта гучыць іранічна, але, па факце, Дашдандог стварыў мангольскі рок-бойз-бэнд і пачаў пісаць для яго песні. Бэкграўнд у музыкантаў быў зусім розны, і таму першай справай прадусар адправіў хлопцаў у вандроўку па Манголіі — 3100 кіламетраў, каб адчуць сапраўдны вайб краіны і яе сапраўдны голас. Так Галбадрах «Гала» Цэндбаатар, Энхсайхан «Энхууш» Баджаргал, Нямжанцан «Джая» Галсанджамц і Тэмуулен «Тэмка» Наранбаатар выправіліся ў вандроўку, якая перавярнула іх жыццё, і запісалі свой першы міжнародны хіт — Yuve Yuve Yu. 

У гэтым відэа спалучаецца сучаснае Манголія і сапраўднае качавое фэнтэзі. Удзельнікі гурта займаюцца штодзённымі справамі, але раптам пераўтвараюцца ў старажытных волатаў з народнымі інструментамі ў руках. Тут можна ўбачыць марынхур — нацыянальны смыкавы інструмент, больш вядомы свету варган, цуўр — мангольскую флейту, двухструнны топшуўр. Але галоўнай фішкай маладога гурта былі гарлавыя спевы. Да гэтага міжнародная публіка бачыла такое хіба што ў кіно ці навуковых перадачах пра будысцкія манастыры. А тут чацвёра хлопцаў, якія быццам выйшлі са старажытных малюнкаў эпохі панавання татара-манголаў, спяваюць гэта ўсё пад акампанемент аўтэнтычных інструментаў, але ўсё разам яно гучыць як сапраўдны заходні стылёвы рок-бэнд. 

У гэтым увесь геній Дашдандога — ён піша зразумелую сусветнаму слухачу музыку і выкарыстоўвае звыклыя для яго прыёмы, але пры гэтым дадае туды шмат менавіта мангольскага каларыту і эпасу. 

image

Яшчэ больш гэты падыход спрацаваў у наступным сінгле Wolf Totem — пачаліся ўсе гэтыя бясконцыя мільёны праглядаў, і ўпершыню гурт з Манголіі трапіў у чарты Billboard. Больш за тое, заняў там першае месца ў Hard Rock Digital Songs Sales.

The Hu сталі сапраўднай сенсацыяй! Музыканты раздавалі інтэрв’ю сусветным медыя, выкарыстоўваючы для гэтага гугл-перакладчык, вандравалі з гастролямі па свеце і збіралі захопленныя водгукі. Пачытайце каментары па іх кліпамі — рандомныя карыстальнікі пішуць пра тое, што ім адразу захацелася скокнуць на каня і панесціся па бясконцым стэпе. Негатыву вы там не знойдзеце — хіба што ад людзей, якія адстойваюць гістарычную справядлівасць і лічаць Чінгіс-Хана (пра яго шмат спяваецца ў трэках The Hu) крывавым дыктатарам. 

Хлопцы ў інтэрв’ю падкрэсліваюць, што праслаўляюць родную краіну і яе гістарычную мінуўшчыну. Яны, дарэчы, так і акрэслілі жанр, у якім граюць — хуну-рок. Яны назвалі яго ў гонар старажытнай качавой канфедэрацыі, ад якой кітайцы ратаваліся за сваёй знакамітай сцяной. А свой дэбютны альбом The Hu назвалі The Gereg у гонар першага ў сусветнай гісторыі дыпламатычнага пашпарту, які прыдумалі ў эпоху Чынгіс-Хана. 

— Людзі думаюць аб Мангольскай імперыі толькі як аб военачальніках і ваярах. Але імперыя прынесла свету так шмат пазітыўных рэчаў, напрыклад, першую паштовую сістэму, першы міжнародны гандаль на Шаўковым шляху і дыпламатычны пашпарт.

— The Guardian

Музыканты раслі ў Манголіі дзевяностых — вельмі спецыфічнай краіне, дзе толькі-толькі абрынуўся камуністычны ўплыў. Пры ім рок-музыка была пад забаронай, і, калі ў Беларусь, сёе-тое магло трапіць праз краіны Балтыі ці Польшу, то ў Манголіі такога шансу не было. Людзі пачалі адкрываць для сябе новыя гурты і новае гучанне, захапляцца папулярнай музыкай і спрабаваць рабіць яе так, як гэта рабілі іх куміры. Спачатку гэта была проста калька без разумення свайго індывідуальнага стылю, але праз некаторы час музыканты паступова пачалі прыходзіць да сваіх каранёў і шмат эксперыментаваць з аўтэнтычным гучаннем. Бадай, лепш за астатніх гэта атрымалася акурат у Дашдандога, які піша ўсю музыку і тэксты для The Hu. 

image

Альбом The Gereg стаў сапраўднай сенсацыяй. Паўсюль музыканты рабілі шматтысячныя солд аўты, іх пачалі запрашаць на буйныя фестывалі, а Metallica прапанавала паўдзельнічаць у сваім трыб’юце The Metallica Blacklist, для якога музыканты запісалі песню Through the never. Зацаніце, што атрымалася!

З The Hu захацелі працаваць абсалютна ўсе. Вось вам версія іх хіта Wolf Totem з вакалістам Papa Roach на фітах. 

А гэта трэк This Is Mongol (Warrior Souls) з Уільямам Дзювалем з Alice in chains. 

Самае цікавае, што The Hu сталі сапраўдным адкрыццём не толькі па ўсім свеце, але і ў роднай Манголіі. Кожны іх кліп пра прыгажэйшую прыроду краіны і яе гістарычную мінуўшчыну, і гэтыя кліпы настолькі заляцелі, што Манголія рэзка скокнула ва ўзроўні міжнароднага турызма. Хлопцы нават атрымалі ад урада краіны найвышэйшую дзяржаўную ўзнагароду — Ордэн Чынгіс-Хана — за прамоцыю мангольскай культуры па ўсім свеце. Уявіце, каб беларускі ўрад узнагародзіў медалём Францыска Скарыны не дробышаў з кіркоравымі, а гурт «Троіца». 

image

У 2022 годзе гурт запісаў свой другі альбом Rumble of Thunder. Больш за гадзіну аўтэнтычных мангольскіх мелодый, запакаваных у сучаснае рок-гучанне. У Брытаніі альбом стаў сапраўдным хітоў і дабраўся ажно да трэцяй пазіцыі ў UK Rock & Metal Albums. Там сапраўды ёсць вельмі крутыя песні. Вось вам, напрыклад, Mother Nature фітом з LP.

А вось фіт з Сержам Танкянам з System of a down. 

Ці новая песня Bosoo Huh Mongol

Але самае цікавае, канешне, назіраць за жывымі выступамі гурта, таму што гэта сапраўднае шоў. The Hu выступаюць у пашыраным складзе з васьмі чалавек і выкарыстоўваюць традыцыйныя для рок-музыкі гітары і бубны, а таксама народныя інструменты. Выглядае ўсё эпічна!

The Hu — гэта вельмі цікавы прыклад таго, як працуе якаснае прадусаванне і як з дапамогай музыкі рабіць якаснае прома сваёй краіны. Гэта зразумелае і яскравае сярэднявечнае шоў, за якім вельмі цікава назіраць і якое выглядае вельмі нязвыкла для носьбітаў іншай культуры і вельмі драйвова і крута для мангольскіх фанатаў. Абавязкова зацаніце гэтую музыку, калі яшчэ ніколі не чулі пра The Hu. Яны таго вартыя! 

Дзякуй, што падтрымліваеце канал, і за тое, што прачыталі гэты матэрыял! Я спадзяюся, што вам спадабалася гісторыя і музыка The Hu. Заставайцеся з «Міністэрствам сепультуры» - у наступным месяцы я прынясу вам яшчэ адзін цікавы сюжэт. Да сустрэчы!

Ваш міністр

Подобається цей допис?

Купити для Aliaksandr Charnukha каву

Більше від Aliaksandr Charnukha