Прывітанне,
Трохі навінаў з палеткаў Бізона Гігса. Паціху (да 31 кастрычніка) завяршаем Крок 1. Збор фонду прэміі.
Маем больш за 55% = 565 долараў ад 27 данатараў. Сярэдняя сума данату — каля 20 долараў.
Хаця праз тыдзень пачынаецца наступны Крок 2 — намінаванне, фонд прэміі будзе збірацца да абвяшчэння пераможцаў у снежні. Таму можаце падтрымаць рублём (еўра, злотым, доларам) да 19 снежня, і сабраная сума пойдзе пераможцу.
Што з наступнымі датамі? 31 кастрычніка стартуе намінаванне. На нашым канале ў Інстаграме @bison.higgs і тут на баймікофі выкладзем спасылку на анкету ў адкрыты доступ, і можна будзе да 27 лістапада намінаваць.
Нагадаю некалькі правілаў намінацыі.
1/ Намінаваць беларускага (!) навукоўца мусяць два чалавекі.
2/ Навуковец можа займацца як акадэмічнай навукай, так і грамадзянскай. Гэта значыць, неабавязковая прывязка навукоўца да афіцыйных інстытутаў, важная бачнасць яе/яго дзейнасці іншым.
3/ Дзейнасць навукоўца палягае ў натуральных навуках, навуках аб Зямлі і дакладных дысцыплінах.
Анкеты раім запаўняць уважліва, таму патурбуйцеся загадзя, каб ваша тлумачэнне ўтрымлівала аргументы, чаму навуковец варты намінацыі. Падайце спасылкі на старонкі альбо файлы з доказамі працы гэтага навукоўца. Будзем таксама ўдзячныя за спасылкі на фота з навукоўцамі.
Дзякуй усім, хто бярэ ўдзел у рэалізацыі другой эдыцыі Бізона Гігса. Для нас вельмі важна развіваць свабодную беларускую навуковую супольнасць. А супольнасць — гэта і самі навукоўцы, і тыя, хто падтрымлівае іх, папулярызуе веды.
Сачыце за абнаўленнямі. Хутка выкладзем анкету.
ЗЫ
На фота кампазіцыя скультур побач з універсітэтам Міцкевіча ў Познані (Польшча). Натхніла мяне вобразам кнігі і лэптопа. Камень прыме ўсё, ці амаль усё=)