Прывітанне! Гэта Максім і Кірыл з падкаста «Зроблена ў Польшчы». Як вашыя справы? Ведаем, што на ліст адказаць нельга, але запрашаем у каментары да паста на Buy me a coffee ці Patreon, нам сапраўды цікава!
Што мы з вамі зрабілі
Спачатку — лічбы, якімі мы ганарымся і гонар за якія мы хочам падзяліць з вамі, бо ўсё гэта мы зрабілі з вашай падтрымкай. Дасягненні «Зроблена ў Польшчы» за выбарчы перыяд (красавік-травень + 1 чэрвеня):
• больш за 100 тысяч праглядаў вялікіх відэа і трансляцый на YouTube;
• больш за 800 тысяч праглядаў відэа на ўсіх платформах (ютуб, інстаграм, тыкток);
• 1 тысяча чалавек у пікавы момант жывой трансляцыі падчас другога тура выбараў.
Травень стаў рэкордным па прыходах з рэкламы, у той жа час — і па расходах на арганізацыю трансляцый. Але разам з вашай падтрымкай і падтрымкай людзей, якія данацілі праз ютуб, мы пакрылі ўсе выдаткі.
Што яшчэ? На ютубе ўжо больше за 3,200 падпісак, пакрысе набліжаецца да першай тысячы аўдыторыя ў тыктоках вядоўцаў і інстаграме падкаста (дзесьці хутчэй, дзесьц трэба яшчэ 200+ чалавек).
Што далей
Як вы ўжо пабачылі, падкаст працягваецца, а палітычнае жыццё Польшчы пасля выбараў не становіцца менш цікавым. Першыя крокі новага прэзідэнта Наўроцкага, прызывы да адстаўкі прэм’ера Туска, апошнія месяцы прэзідэнта Дуды, падрыхтоўка Канфедэрацыі да наступных выбараў у Сейм — усё гэта вельмі захапляльна. Да таго ж, уводзяцца новыя правілы для мігрантаў у розных сферах, за гэтым таксама сочым.
Што да фарматаў, пакуль мы вяртаемся да выпускаў па серадах, па магчымасці будзем здымаць дадатковыя матэрыялы і на ютуб, і на іншыя платформы. Таксама будзе больш тэкставых навінаў, не губляйце іх.
З чым будзем эксперыментаваць далей: з новымі тэмамі (не толькі палітыка), з новымі людзьмі (хочам рабіць больш каментароў і інтэрв’ю з прадстаўнікамі і прадстаўніцамі польскай палітыкі). Паспрабуем зладзіць сустрэчу ў Варшаве на беларускай мове.
І дарэчы — хутка ў «Зроблена ў Польшчы» дзень народзінаў. Другі год падкаста стане ўмоўным другім сезонам. Якім ён будзе — залежыць таксама і ад вас. Дасылайце свае ідэі і прапановы ў любым камфортным для вас фармаце. Мы будзем вельмі ўдзячныя! Рэагуем на вашыя пажаданні і плануем і далей так рабіць.
Дзякуй і да сустрэчы ў новых выпусках і лістах,
Максім і Кірыл