Прывітанне, сябры!
Роўна год прайшоў з таго моманту, як з’явіўся праект Сепультура Alive. Вы — галоўныя фундатары Сепультуры, таму гэтая справаздача спецыяльна для вас.
Ад самага пачатку Сепультура Alive існавала толькі дзякуючы вашай падтрымцы. Цягам году і 11 канцэртаў мы сабралі 30130 еўра, гэта вельмі шмат! Мы з вамі змаглі цэлы год разам рабіць канцэрты любімых гуртоў і плаціць ім ганарары за выступы. Мне падаецца, што гэта вельмі круты вынік, і вы можаце сабой ганарыцца!
З гэтай сумы 20706 еўра склалі тэхнічныя выдаткі: арганізацыя трансляцыі і відэамантажу, гукарэжысёр і арэнда абсталявання, аплата лагістыкі, праектны мэнэджар. Усе канцэрты, якія вы бачылі, робіць маленькая каманда з шасці чалавек (дзякуй ім за гэты подзвіг!).
Сярэдняя сума выдаткаў на адзін канцэрт — 1700 еўра, і гэта сапраўдны мінімум за такі аб'ём працы. Мая праца (прадусаванне, мэнеджмент, бюджэты, піяр, праца вядучага і сцэнарыста) і праца музыкантаў не ўваходзіць у гэты "тэхнічны" мінімум, таму мы дзелім з музыкантамі пароўну тое, што ўдалося сабраць звыш усіх выдаткаў.
Пяць месяцаў Сепультура Alive існавала вось у такім фармаце: пад маю фінансавую адказнасць. Пасля на дапамогу прыйшлі добрыя людзі, і ў нас з’явілася магчымасць закрываць значную частку тэхнічных выдаткаў. Без гэтага некаторыя канцэрты прайшлі б у мінус.
Але зараз гэтая падтрымка скончылася, а штомесячныя падпіскі на Сепультуру Alive істотна скараціліся — зараз гэта 380 еўра штомесяц. То бок працаваць як раней, ужо немагчыма.
Таму я вырашыў памяняць логіку арганізацыі канцэртаў. Спачатку мы абвесцім імя музыканта і збор на тэхнічныя выдаткі па трансляцыі (каля 1700 еўра), а калі назбіраем поўную суму (справаздачы я буду рабіць рэгулярна) — назавем дату івэнта. Грошы, сабраныя падчас трансляцыі і цягам тыдня пасля яе, як і раней, будуць дзяліцца пароўну паміж музыкантамі і мной.
Магчыма, канцэрты будуць працягвацца раз на месяц, магчыма — раз на паўгады. Прагназаваць складана, але я вельмі спадзяюся, што ў нас з вамі ўсё атрымаецца
Як вы можаце дапамагчы?
Самы эфектыўны спосаб — штомесячная падтрымка, якая дае магчымасць планаваць і разлічваць бюджэт. Таму далучайцеся, падтрымлівайце, а мы будзем рабіць для вас крутыя канцэрты!
https://buymeacoffee.com/sepulive/membership
Нават разавы данат у 5 еўра будзе набліжаць нас да чарговага канцэрту.
https://buymeacoffee.com/sepulive
Імя артыста, які наступным выступіць у Сепультуры Alive, я назаву на наступным тыдні. Дзякуй за вашую неабыякавасць, падтрымку і вялікую любоў да беларускай музыкі.
Ваш міністр.