Гэты допіс я пакідаю адкрытым для ўсіх — каб вы маглі ўявіць, чым я тут дзялюся і што нараджаецца ў маёй прасторы 🌿 Падтрымаць мяне кубачкам кавы і зазірнуць за кулісы творчага працэсу — вельмі проста і надзвычайна прыемна ☕
Дзякуй за ўвагу і цікавасць да маёй творчасці 🖤
Сёння рылася ў старых PSD-файлах і знайшла адзін са сваіх першых эскізаў Праявы — той самай празорлівай душалекаркі-гарпіі з вясёлкавымі крыламі.
Тады ўсё пачыналася на паперы, з дробных замалёвак і абрысаў — толькі потым яны пераходзілі ў лічбу, пласт за пластом. І вось — жывая памяць, схаваная ў слаях фаташопу 🎨
Цікавы факт: з таго часу я даведалася, што слова камода па-беларуску — жаночага роду, як і слодыч. Ведалі? 😄
Хачу падзяліцца з вамі неймаверным прататыпам птушкі, якой я натхнялася падчас працы — гэта гарпія (Harpy eagle). Яна — жахлівая драпежніца, адна з самых магутных у свеце птушак, але менавіта гэтая моц і выклікае маё захапленне. Для мяне гарпія — ідэальны вобраз для псіхалагіні. Яна бачыць з вышыні і ў глыбіню (😆), зырка, дакладна, беспамылкова. Яна мудрая і цярплівая, але калі трэба — здольная на імклівы і дакладны рух. Гарпія не баіцца цемры — яна частка яе асяроддзя. Яна нясе сабой моц, інтуіцыю і прысутнасць.
Сама я назву "Праява" падгледзела ў цудоўнай кнізе Артура Басака (пры ўдзеле Аліны Длатоўскай) "Беларускія нячысцікі: лясныя". Там праява — зусім не міленькая істота, а жахлівая пачвара з гушчару 😅 Але мне гэтае слова гучыць зусім інакш: як нешта, што праяўляецца, выходзіць на паверхню, нараджаецца знутры. І ў гэтым — столькі волі для ўяўлення, творчасці і гульні.
Дарэчы, Праява стала не толькі часткай майго коміксу, але і своеасаблівым сімвалам творчай суполкі, у якой я ўдзельнічала (і хачу з цягам часу яе аднавіць). Суполка нарадзілася вакол вобразу гэтай гарпіі. Мы — беларускія маста:чкі — некаторы час збіраліся анляйн (з некаторымі і афляйн у Менску), каб разам маляваць, дзяліцца натхненнем і падтрымліваць адна адну. Цяпер тая ініцыятыва, як і многія важныя рэчы, захоўваецца больш ціха і асабіста. Але яна жыве — у кожным малюнку, у кожнай гісторыі, і ў вас, хто побач. 🖤
Я ўжо аднавіла лога суполкі, але шукаю аднадумцаў, каб пачаць далейшую працу. Ці ўвогуле змяніць вектар дзейнасці!.. Карацей, пытынне гнуткае і калі вы хочаце далучыцца для стварэння інклюзіўнай творчай суполкі па-беларуску: ПІШЫЦЕ МНЕ ДЗЕ ЗАЎГОДНА! А таксама можаце падзяліцца сваімі ўражаннямі пра адноўлены лога:
Для мяне гэта вельмі асабіста, і я вельмі рада паказаць гэты кавалак працэсу менавіта тут — тым, хто падтрымлівае мой шлях. Дзякуй вам. Гэта дапамагае мне працягваць маляваць, выдумляць, ствараць важныя праекты, і — не менш важна — жыць у кватэры, а не ў камодзе 😅
Будзе яшчэ шмат цікавостак — сачыце далей!