我哋製作《電動大GO玩》係因為Podcast平台上實在太少廣東話嘅節目，洽巧我哋都係熱愛打機、睇戲、睇漫畫嘅毒撚，又有媒體製作經驗背景，於是決定係香港言論自由日漸收窄嘅日子當中，留低些少自由鳩噏嘅聲音，分享我哋對所愛嘅遊戲、電影、漫畫嘅睇法同觀點俾各位毒撚同好。
製作Podcast節目好簡單，只不過係㩒個掣、講幾句廢話就能夠完成嘅事。
當初我哋都係抱住咁嘅諗法開始製作，但做落其實都要落一番功夫，事前要諗傾啲咩題目，不單止要夠「愛」仲要「夠料」講。決定題目之後多少都要做少少資料搜集，至少確保自己講嘅內容唔會錯得太離譜。仲要約大家都得嘅時間，搵個安靜嘅空間錄音，咁啱時間同空間就係香港最貧乏嘢。
有一啲基本嘅製作工具如錄音咪其實都買過幾款，先可以達到可以接受嘅音質，錄音軟件都試過好幾隻，先試到一款免費，但音質又OK但有時間限制嘅軟件。預備錄製一集嘅工作量就好似上「暗斜」一樣，唔覺唔覺都會行到氣喘。
錄完一集節目之後，少不免都要做後期剪接，將口殘、黐脷根、老尷Dead-Air嘅段落剪走，剪接一個節奏較好嘅節目俾願意百忙中抽空聽節目嘅親朋好友收聽。上載之後再重聽一個約一小時，自己聽完會覺得尷尬嘅節目去撰寫節目內容重點介紹，方便聽眾快速了解集數內容。最後再搵美術朋友無償製作IG貼文封面圖，再係社交媒體發布新一集，如此先算完成一集錄音。
每製作一集錄音大概需要投入8-12小時製作，但條路自己揀，辛苦唔會喊。可以分享心聲其實係難能可貴嘅機會，縱使聽眾唔多，但都有親朋好友特別支持。如果各位看倌讀到依度，覺得我哋嘅節目係有價值，不妨打賞幾個大洋俾我哋，等我哋知道自己唔係對住空氣講嘢，可以有錢買付費版錄音軟件或者講到口乾可以飲啖水。
寫到依度，非常感謝各位親朋好友嘅支持，記得要繼續收聽《電動大GO玩》，訂閱留言讚好節目，等目前仲未存在嘅Podcast演算法將節目推薦俾更多親朋好友收聽。
《電動大GO玩》所有連結:
https://linktr.ee/daigoplay
By 新星