У сваім аповедзе пра мой першы СП https://www.buymeacoffee.com/daisyds/n-a-1762150 я імкнулася дэталёва апісаць свае эмоцыі і адчуванні.
Калі вылучыць асноўнае, гэта:
разуменне, што ты не ўва сне;
немагчымасць рухацца, гаварыць (адчуванне паралізаванасці і апускання ў глейкую субстанцыю пры спробе паварушыцца);
слыхавыя і зрокавыя галюцынацыі (перакручаны гук + звон/гуд у вушах і дзіўныя выявы перад вачамі);
адчуванне наяўнасці чужога побач;
моцнае пачуццё страху і ўпэўненасць у тым, што табе хочуць прычыніць зло або нават забіць;
адчуванне нястачы паветра;
перакручанае ўспрыманне часу.
Гэта тое, з чым сутыкнулася менавіта Я САМА.
Але вось, што цікава: кожны раз адчуванні могуць змяняцца. Яны могуць быць падобнымі, так, але не абавязкова аднолькавымі. Таксама і адчуванні іншых людзей могуць не супадаць з вашымі (на прыкладзе тых жа зрокавых галюцынацый — іх можа зусім не быць).
З такой з'явай, як СП, насамрэч, сутыкаецца вялікая колькасць людзей і, напэўна, самым пашыраным апісаннем СП з'яўляецца:
пачуццё здушанасці ў грудзях;
зрокавыя галюцынацыі ў выглядзе істоты (напр. вядзьмаркі), якая сядзіць зверху і душыць.
📍*Сонная цікавінка пра вядзьмарак і не толькі 
УууУуу! Страшна? 😱
Разумею. Веру.
Але зразумейце і вы, сонейкі, адно: рэлігія (якая б яна ні была), забабоны і інш. — гэта тэмы, без сумневу, вееельмі цікавыя, глыбокія і па-свойму значныя, бо ідуць сваімі каранямі ў найстаражытнейшыя часы. Але давайце не будзем забываць і пра тое, што ў нашай галаве ўсталяваны неверагодна магутны і складаны кампутар, які апрацоўвае ТАКУЮ ШАЛЁНУЮ КОЛЬКАСЦЬ ІНФАРМАЦЫІ за содні, што як мінімум не сумленна прыпісваць усе яго заслугі божышчам і дамавікам ;)
Таму, вось што важна зразумець на дадзены момант:
Сонны параліч — гэта стан, падчас якога ваш мозг усё яшчэ знаходзіцца ў Фазе Хуткага Сну (фаза, якая адказвае за сны і падчас якой, дарэчы, блакуецца ваша цяглічная актыўнасць, каб вы не маглі фізічна рэагаваць на сон), а вы ў гэты момант апынаецеся ў свядомасці. То бок, простымі словамі — гэта збой у сістэме. Гэта можа адбыцца па некалькіх прычынах, такіх як: фізічная стомленасць, нерэгулярны сон, стрэс і інш. (пра гэта мы яшчэ пагаворым).
Памятайце: якім бы рэальным не здавалася ўсё тое, што вы чуеце або бачыце падчас СП — гэта не праўда. Але часта сон накладаецца на СП, праз што могуць з'явіцца галюцынацыі (хоць, канешне, ўсё можа абысціся і без іх).
І як бы вам не было складана ў гэты момант — вельмі важна, УВАГА, паслабіцца і пастарацца не паддавацца паніцы!
Вы не задыхняцеся! Вы не памрэце і тым больш вас НЕ ЗАБ'Е ЗВАР'ЯЦЕЛАЯ БАБКА! Нават калі яна вельмі рэалістычна на вас сядзіць! 😉
Дарэчы, ёсць адзін спосаб, які мне аднойчы падказалі і я апрабавала яго на сабе: падчас СП паспрабуйце сканцэнтравацца на вялікім пальцы рукі/нагі і паварушыць ім. Гэта дапаможа вам нармальна прачнуцца. Паступова, магчыма, павольна, але дапаможа.
Калі ласка, сачыце за сваім эмацыйным і фізічным станам. Калі вы адчуваеце, што не спраўляецеся з праблемамі, эмоцыямі і пачуццямі, калі вы не можаце спаць увогуле або спіце дрэнна, або СП у вас здараецца занадта часта і вас гэта палохае — звярніцеся, па магчымасці, да спецыяліста.
Гэта абсалютна нармальна — клапаціцца пра сваё здароўе ❤️
***
Дагэтуль думаю: калі б мне ў свой час трапіўся дзе-небудзь на абшарах інтэрнэту акаўнт, у якім расказваюць пра СП, праўду кажучы, жыць стала б значна лягчэй. А думак пра тое, што ў мяне едзе дах і я — апантаная д'яблам — было б нашмат менш.
Таму помніце: вы не адны!
Ваша Сонная.
*выява ўзята з інтэрнэту, скрын артыкула з вікіпедыі